1Ki 3 | ZomZIV | STEP | Solomon in Egypt kumpipa Pharaoh tawh kipawlna bawlin a tanu a tenpih hi. Amah in kumpi inn, TOPA biakinnpi le Jerusalem kimkota kulh a mansiang mateng David Khuapi ah amah a paipih hi.

1 Kings 3

Solomon in Pilna Ngen

1 Solomon in Egypt kumpipa Pharaoh tawh kipawlna bawlin a tanu a tenpih hi. Amah in kumpi inn, TOPA biakinnpi le Jerusalem kimkota kulh a mansiang mateng David Khuapi ah amah a paipih hi. 2 Ahi zongin TOPA min ading biakinnpi kilam nai lo ahi manin mite in munsangte ah biakna a pia lai tadih uh hi. 3 Solomon in munsangte ah biakna pia in gimnamtui a hal lohbuang a pa David ngeina kipte banga kalsuanna tawh TOPA tungah a itna a lak hi.

4 Munsang thupi pen Gibeon ahi manin biakna pia dingin kumpipa tua lai-ah pai a, Solomon in tua biakna-tau ah meihal biakna tul khat a pia hi. 5 Gibeon ah zan laitakin Solomon mang ah TOPA kilang a Pasian in, “Kong piak ding na deih peuhpeuh hong ngen in,” a ci hi. ^a

6 Solomon in, “Na nasempa ka pa David tungah na migitna na lak zo hi, bang hang hiam cih leh amah nang tungah muanhuai-in thumaana a lungsim a thutang hi. Hih na migitna lianpi ama tungah na zomsuak a tuni mahmah in ama tokhom a tu ding tapa khat na pia khin hi.

7 Tu-in TOPA ka Pasian aw, ka pa David mun ah na nasempa kumpi na suaksak hi. Ahi hangin kei naupangno khat ka hi a, ka mawh puakte koici sep ding cih ka thei kei hi. 8 Na teelsa mi sim zawh loh a tampite lak hih lai-ah na nasempa ka om hi. 9 Tua ahi ciangin na mite uk nading le akhial le amaan khentel theih nadingin khentheina lungsim kei hong guan in. Ahang in, hih nangma mi tampitakte kua in uk zo ding ahi hiam?” ci-in a dawng hi.

10 Solomon in hih a ngetna hangin Topa a lungkim hi. 11 Tua ahi ciangin Pasian in ama kiangah, “Nang in hih nong ngen hi, khansawt nading ahi a, neih le lam ahi-a, na galte sih nading ahi zongin hong ngen loin thu khentheihna tawh thutanga uk theih nading hong ngen na hi manin 12 nong nget mah kong pia ding hi. Nang tawh a kibang a om ngei nai lo leh a om ngei nawn lo dingin pilna le thutheihtelna lungsim nang kong pia ding hi. 13 Tua banah na nuntak hun sung teng kumpite lakah na kibatpih a om loh nadingin nong nget khak loh - hauhna le pahtawina kong pia ding hi. 14 Tuateh ka lampite tawna, na pa David hih bangin ka ngeina kipte le ka thupiakte na man leh khansawtna zong kong pia ding hi,” a ci hi. 15 Tua ciangin Solomon khanglo a - a mang ahilam a thei hi. ^b

Amah Jerusalem ah ciah kik a, Topa thukhun singkuangpi mai-ah dingin meihal biaknate le kilawmtakna biaknate ^{▼▼3.15 Tang ngeina-in kilemna biaknate} a pia hi. Tua ciangin a kumpi uliante khempeuh adingin pawi a bawl hi. ^d

Pilna tawh Thukhenna

16 Kumpipa kiangah numei kizuak nih pai-in a mai-ah a ding uh hi. 17 Amaute khat in, “Ka topa aw, hih numei tawh inn khatah ka tengkhawm uh hi. Amah tawh ka omkhawm sungun ta khat ka nei hi. 18 Ka ta suah zawh a nithum ni-in hih nu in zong ta khat mah a nei hi. Ko guak bek ka om uh a; inn sungah kuamah dang om loin kote gel bek ka hi uh hi.

19 “Zanin tuanu in a tapa nenkha in a si hi. 20 Tua ahi ciangin zankim laitakin amah tho-a, na nasemnu ka ihmut kalin ka panga ka tapa a la hi. Amah in a angah koih-a a tapa sisa kei angah a koih hi. 21 A zingsang ciangin ka tapa nawi pia dingin ka tho a - amah na si mawk hi! Ahi hangin zingsang khuavak ah limtaka ka et ciangin tua pen kei sunga suak tapa hi lo hi,” a ci hi.

22 Numei khat pen in, “Hi kei! A hing pen kei tapa hi-a, a si pen nang aa ahi hi,” a ci hi.

Ahi hangin a masa pen in, “Hi kei! A si pen nang aa ahi hi; a hing pen kei aa hi,’ ci teitei hi. Tua bangin kumpipa mai-ah a kisel uh hi.

23 Kumpipa in, “Hih pen in, ‘A hing pen kei tapa hi, nang tapa a si hi,’ ci a, hua pen in, ‘Hi kei! Nang tapa a si hi, kei aa a hing pen hi,’ ci hi,” a ci hi.

24 Tua ciangin kumpipa in, “Namsau khat hong la un,” a ci hi. Tua ciangin amaute in namsau khat kumpipa a pia uh hi. 25 Tua ciangin mah in: “Naupang a nungta pen tumnih suah unla, alang khat pia in, alang adang khat pen pia un,” ci-in thu a pia hi.

26 Tapa a hing pen’ nu in a tapa khuatuah a, kumpipa kiangah, “Ka topa aw, nong hehpihna-in naupang a hing pen amah pia in! Amah that kei in!” a ci hi.

Ahi hangin a khat pen in, “Nang na hi-a, kei ka hi zongin a nei i om tuam kei ding hi. Tum nih suah in!” a ci hi.

27 Tua ciangin kumpipa in a thukhenna pia a, “Naupang a nungta pen a masa numei pia un. Amah that kei un; tuanu ama nu ahi hi,” a ci hi.

28 Israel khempeuh in kumpipa thukhenna a zak uh ciangin kumpipa lamdang a sa uh hi, bang hang hiam cihleh amah in Pasian tung panin thutanga gam-uk nading pilna a neih lam amaute in a mu uh hi. ^e